LA UNION – Nagyaman ni Office of Civil Defense Usec. Ricardo Jalad iti lokal a gobyerno ti La Union ken iti Dept. of Public Works and Highways (DPWH) gaputi pannakaipatakder ken pannakakumpleto ti P60 million a balor ti OCD building ditoy San Fernando City, La Union.
Iti interview ti Bombo Radyo kenni Usec. Jalad, kinuna na nga agserbi a ‘point of convergence’ ti amin nga stakeholders iti nasao nga opisina ken dackel met a tulong daytoy para iti mas epektibo a panangipatungpal ti pagrebbengan da iti ili, nangruna iti panagresponde iti kalamidad.
Ni Usec. Jalad iti nagserbi a kangrunaan a bisita iti inagurasyon ti baro nga opisina ti ahensiya idi kalman, Nobyembre 25 ti agdama a tawen.
Immunan nga imbaga ni OCD Region 1 Director Melchito Castro, daytoy ti agserbi a legacy na iti umadanin apanagretiro daytoy iti serbisyo.
Naamwan nga 45 tawenen iti serbisyo ni Castro ken nakatuding nga agretiro iti masungad nga aldaw maiyannurot iti mandatory age a 65.
Nupay kasta, imbaga ni Jalad nga awan pay iti napili da a sumukat iti ibati a posisyon ni Castro.
