LA UNION – Impanamnama ti lokal a gobyerno iti syudad ti San Fernando, La Union a nakasaganan ti vaccination rollout plan.
Kabayatan ti Ammuen Tayo Program ti San Fernando City Government, kinuna ni Mayor Hermenegildo ‘Dong’ Gualberto a bassit laengen ti risutenda para ti maaramid a vaccination rollout kas ti kanayunan a cold storage facilities para kadagiti magatang a COVID-19 vaccines.
Sigun kenni Gualberto, adda iti lima a nadeterminan a vaccination sites ti syudad.
Tunggal lugar a pakaisayangkatan ti bakuna ket addaan ti maysa a mangimaton a doktor, karaman dagiti nurses ken midwife.
Imbatad ni City Health Officer Dr. Arman Carrera, a dagiti bakuna nga addaan ti approval ti Food and Drugs Administration (FDA) para ti emergency use authorization (EUA) ti gatangen iti lokal a gobyerno a maibakuna kadagiti residente iti syudad.
Kabayatanna, impaganetget ni Department of Health (DOH) Regional Office-1 Assistant Regional Director Mar Wynn Bello iti kinapateg ti panagpabakuna dagiti umili kontra ti COVID-19.
Sigun kenni Bello, malapdan ti pandemya no agballigi ti gobyerno a mabakunaan iti 70 percent a populasyon.
Iti umuna a target ti vaccination rollout ket dagiti frontline health workers wenno agtrabtrabaho kadagiti ospital.
Immapela ni Bello iti kooperasyon dagiti residente tapno agballigi ti gobyerno a malabanan ti COVID-19 pandemic.
Maipalagip, aganay P84 million a pondo ti inlatang iti San Fernando City Government para ti panaggatang iti COVID-19 vaccines.
