LA UNION – Inarestar dagiti otoridad iti maysa a vape shop owner iti insayangkat nga intelligence driven anti-illegal drugs operation (buy-bust) babaen kadagiti otoridad nga indaulwan ni PMaj Benjie Daireu Umalla, agdama a hepe ti pulisiya ditoy syudad ti San Fernando.
Napasamak ti operasyon agarop alas 5:45 idi malem kalman, May 19, 2021 idiay Purok 1 Brgy. Bacsil ditoy syudad.
Nabigbig ti suspek iti nagan a Tj Marjoe Tiu y Santa Ana, alyas Sebon, 28-anyos, baro, maysa a listed drug pusher ken maibilbilang nga High Value Individual, tubo ti Brgy Dalumpinas Oeste ngem temporaryo nga agnanaed idiay Purok 6, Brgy Santiago Norte, San Fernando City, La Union.
Nakumpiskar kenkuana iti dua a heat sealed plastic sachet iti maatap a shabu, agdagsen ti 0.4 grams ken 5 grams, ken mapatta-patta nga agbalor amin iti P3,220; agraman iti maysa a pidaso ti genuine P500 bill ken maysa met a peke a P1-k bill a nagserbi a buy bust money.
Nakumpiskar pay kenkuana iti maysa nga android phone ken nangisit a motorisklo.
Iti suspek ket naidatagan ti kaso a panaglabsing iti RA 9165 wenno Comprehensive Dangerous Drugs Act of 2002.
Agtaltalinaed daytoy iti custodiya ti San Fernando City Police Station.
