Inbinglay dagiti sumagmamano a vendors ditoy siudad ti San Fernando City dagiti kararag ken arapaap da para iti baro a tawen, kas paset ti tradisional a New Year’s resolution dagiti Pilipino.
Iti interview ti Bombo Radyo La Union, imbaga dagiti aglaklako a nupay mabalin nga agduduma ti kayat ti tunggal maysa ket agpapada ti arapaapda: ti maaddaan iti nasaysayaat a pagbiag, natibker a salun-at, ken agtultuloy a panagdur-as ti negosio iti sumaruno a tawen.
Segun kenni Gerald Deguzman. maysa a vendor nga aglaklako iti hotdog sandwiches iti sidong ti negosio a “The Sun and Bowl”, ti laeng tarigagay na iti baro a tawen ket ti ad-adda a pannakaam-ammo ken agtultuloy a dumakkel ti negosiona.
Dakkel met a karit para kadagiti vendors a nangrugi laeng ita a bulan ti Disiembre, iti panangiyam-ammo kadagiti lako-da.
Mangnamnama da a babaen iti tulong ti napinget a panagtrabaho ken suporta manipud iti publiko, magun-od met ti negosiona iti kinalatak kas kadagiti dadduma a vendor a nagbalin a nalatak ken ag-trending iti social media.
Innayonna pay nga iti baro a tawen ket agserbi a baro a gundaway para kadagiti agtagikua ti babassit a negosio .
Kabayatanna, agtultuloy iti panangparegta dagiti aglaklako iti publiko a mangsuporta kadagiti lokal a produkto ken babassit a negosio.
