LA UNION – Pagsasaritaan ita dagiti netizens ti maysa a video ken dagiti ladawan ti lalaki a nangiruar iti mabagbagina iti sango ti female fitness instructor kabayatan a nakalugan dagitoy iti pampasada a jeep idiay syudad ti Marikina.
Iti nasao a video nga agpaut iti 42 segundo, mabuya ti lalaki a naka-bull cap, naka-sando iti stripe, nakasapin iti nalabaga, naka-shades, ken nakaiggem iti tester nga paulit-ulit iti panangiruar ken panagay-ayam ti mabagbagina iti uneg ti lugan.
Base iti insuratna a caption iti saanen a nainaganan a fitness instructor babaen ti bukodna a Facebook account, agarup alas-7:30 idi bigat -kalman ket agawid kuman daytoy a naglugan ti jeepney idi a simmakay met ti saan pay a nabigbig a lalaki.
Kabayatan nga agan-andar ti lugan ket killaat a pinetpetan ti lalaki ti mabagbagina ken inisemanna pay ti babai.
Linengdan met ti fitness instructor ti paper bag dagiti luppona ngem saan pay laeng a nagsardeng iti panagay-ayam ti lalaki iti mabagbagina.
Kugtaranna koma ti lalaki ngem baka isu met iti maitinnag daytoy gapu ta adda iti likudan a paset ti jeep.
Napanunot ti fitness instructor nga alaan iti video ti ar-aramiden a kinabastos ti lalaki agingga nga inruarnan ti mabagbagina.
Gapu iti daytoy, bimmaba iti lugan ti babai ken painagsasawanna iti dakes ti lalaki kasaruno iti panagtarayna nga agsangsangit.
Sigun pay ti fitness instructor, nakasuot laeng daytoy iti nakiting a short pants idi a nangipakita ti kinabastos ti lalaki, ken saanna nga ammo no babalawen isuna dagiti netizens kalpasan a mai-upload iti social media ti nasao a video ken ladawan.
Iti agdama ket umabuten iti 1.5 million views ti nadakamat a video. (Abs Flores)
