Inruaren ti Korte Suprema ti maysa a desisyon a mangipalpalubos iti panangdemolish kadagiti videoke machine, sari-sari store, billiard tables ken dadduma pay a negosyo nga asideg ti baybay.
Manipud ti insurat a desisyon ni Associate Justice Amy C. Lazare-Javier, pinaboran ti Second Division ti Korte Suprema ti bilin ti Court of Appeals a rebbaenen dagiti istruktura a saan met nga otorisado ngem adda kadagiti pampubliko a daga.
Partikular a nadakamat dagiti pasdek-negosyo sadiay Matabungkay Beach idiay Lian, Batangas nu sadino ket awanan ti otorisasyon ti istruktura kasta met iti permit manipud Department of Environment and Natural Resources (DENR).
Mainaig iti daitoy ti panangipila ti kaso dagiti makinkukua ti maysa a resort sadiay Matabungkay Beach kontra met kadagiti operators dagiti unauthorized structures iti igid ti baybay.
Segun iti makinkukua ti resort, makaistorbon dagiti nasao nga negosyo kadagiti bisita a rason met iti pannakalugi da.
Nupay kasta, ti desisyon met ti Regional Trial Court ket saan a pumabor iti reklamo da agsipud ta kurang iti mangpaneknek wenno ebidensya nga dagitoy nga irekreklamo nga istruktura ket rason iti pannakalugi.
Kabayatanna, indeklara met ti Court of Appeals nga ilegal dagiti nakapasdek a negosyo ken maibilang pay dagitoy kas public nuisance.
Nabilin iti demolisyon dagiti istruktura ken napagbayad pay dagiti operators iti danyos ti resort a nangipila ti reklamo.
Pinabora pay ti Korte Suprema ti kinuna ti Court of Appeals a dagiti istruktura ket naipasdek iti public foreshore a daga nga awanan ti lease agreement wenno katulagan iti panagrenta manipud ti DENR.
