Pimmusay ti vlogger a ni Alicia Lipata, nga am-ammo kas Mima Alicia, kalpasan a pinaltugan isuna dagiti saan pay a nabigbig a suspek iti uneg ti ab-abangan na a balay idiay Tierra Nova Subdivision, Barangay 171, Caloocan City, agarup alas-3:06 ti parbangon ita a Biyernes, Hulio 17. Nadangran met ti live-in partner na nga agdama nga agpapaimbag iti ospital.
Maibasar iti inisial nga imbestigasion ti Northern Police District (NPD), sinerrek dagiti dua nga armado a suspek iti balay ti aglive-in partner ken idiay da a napaltogan.
Laksid ti gandat dagiti biktima a makaruar iti balay da, maipagarup a kinamat pay isuda dagiti suspek ken pinaputukan da manen iti kalsada.
Naglak-am iti tama ti bala iti nadumaduma a paset ti bagi, karaman iti ulo, ti 24-anyos a biktima a nakaigapuan ti dagos a pannakatay na.
Kalpasan iti insidente, napartak a timmakas dagiti dua a suspek sakay ti maysa a motorsiklo.
Agtultuloy met a mangisaysayangkat ti backtracking kadagiti CCTV footages ken dadduma pay nga imbestigasion iti pulisya tapno maammuan iti pakabigbigan ken motibo dagiti suspek.
Kas sungbat, nangbukel ti Northern Police District ti Special Investigation Task Group (SITG) tapno tutukan iti kaso ken mapapartak iti panangammo ken panangtiliw kadagiti responsable iti pammaltog.
Kagiddan ditoy, nagpanawagan ti NPD iti siasinoman nga addan ti impormasion mainaig iti insidente a makikoordinar iti Caloocan City Police Station tapno makatulong iti agtultuloy nga imbestigasion.###
