LA UNION – Mapagsasaritaan ita kadagiti naduma-duma a lugar idiay probinya a La Union ti maipagarup a panangiwaras iti grocery items kadagiti botante wenno vote buying.
Base kadagiti impormasyon a naidanon iti Bombo Radyo, maipagarup nga adda dagiti kandidato idiay ili ti Luna, Bauang, Naguilian ken syudad ti San Fernando iti agibunbunong iti grocery items wenno kinilu-kilo a bigas.
Malaksid pay ditoy dagiti kandidato nga agiwarwaras iti kwarta wennodose-dozena a bote ti arak ken pulutan kadagiti botante.
Kabayatanna, uray iti opisina iti Commission on Election (COMELEC) ken makaaw-awat met iti kapada a report.
Iti pannakiuman ti Bombo Radyo kenni La Union Election Supervisor Atty. Joel Gines, kinunana a mabalin nga adda iti kinapudnona maipapan ti panagraira ti vote buying iti probinsya.
Inallukoy ni Atty. Gines dagiti nakaimatang iti panaglakuan ti botos nga agipulong idiay opisinada tapno mangidatag ti reklamo kontra kadagiti karaman ti nasao nga iligal nga aramid.
Saan met nga inlibak ti opisyal a narigat a paneknekan nga adda ti mapaspasamak a vote buying gapu ta saan a ti kandidato ti personal a mangiyaw-awat kadagiti nadakamat a banag no di ket adda ti binilinda a tauhan a mabalin nga aglibak kadagiti mangsitar nga otoridad.
Gapu iti daytoy, kaepektibuan pay laeng kinunana a palagipan dagiti botante maipapan ti dakes nga epekto ti vote buying kalpasan iti eleksyon.
