BR LA UNION – Nakasublin ni Vice President Sara Z. Duterte ditoy Pilipinas kalpasan ti dandani makabulan a panagtalinaedna idiay The Hague, Netherlands.
Maibasar iti impormasyon manipud iti Office of the Vice President (OVP), simmangpet ti Bise Presidente idiay Ninoy Aquino International Airport (NAIA) idi kalman, Domingo, Abril 6 2025, agarup 9:56 ti rabii babaen ti Emirates Airlines flight no. EC 334.
Maipalagip a nagtalinaed ni VP Sara Duterte idiay The Hague, Kingdom of the Netherlands, manipud idi Marso 12 kalpasan ti pannakaaresto ti amana, ni sigud a Presidente Rodrigo Duterte, nga agdama nga adda iti detention facility ti International Criminal Court (ICC) gapu iti kaso a crimes against humanity.
Manamnama nga iti sumaruno nga aldaw ket mangipaulog ti Bise Presidente kadagiti statement maipapan iti dadduma pay a napateg a banag wenno isyu a sangsanguenna ita, segun iti Office of the Vice President.
