Impeksa ni Bise Presidente Sara Duterte a nakasagana isuna a maipasidong iti lie detector wenno polygraph test kasaruno iti panangkarit kenkuana ni Rodulfo Gracioso Junior, nagpaam-ammo a sigud na a bagman.
Kinuna ni Duterte nga awan iti problema kenkuana iti pannakaipasidong iti test, nu laketdi mairuar met iti publiko ti resulta nga aramiden da kenni Gracioso.
Segun iti Bise Presidente, ni Gracioso mismo iti nagkuna a nakapasa isuna iti test ken kayat na laeng a makita ken maiparang daitoy iti publiko.
Impaganetget na pay a saan a dagos a rumrumuar iti resulta ti lie detector test agsipud ta kasapulan pay a basaen ken pasingkedan daitoy dagiti eksperto.
Innayon na a nu maisayangkat iti testing ita nga aldaw ket saan a kayat a satwen a maamwanen a dagos iti resulta kinabigatan.
Maipalagip a naipasidong ni Gracioso iti lie detector test idiay National Bureau of Investigation (NBI) idi Miyerkules, Setyembre 30, mainaig kadagiti kontrobersyal a panangibutaktak na a nangipatulod isuna kadagiti minaleta a gatad ti kwarta ti pamilya Duterte.
