Pinaglibakan ni Bise Presidente Sara Duterte ti nagbalin nga alegasyon ti Malakanyang a palpak ti liderato na kas sekretarya ti Department of Education.
Segun iti Bise Presidente, kinaagpaysuananna ket saan met isuna a pinaikkat ni Presidente Ferdinand “Bongbong” Marcos Junior nu di ket umikkat a talaga isuna kalpasan a nangisubmitir ti resignation kas sekretarya idi napalabas a tawen.
Innayon na a kiniddaw pay ti Presidente nu kayat na ti sabali a posisyon ti gabinete ngem daitoy ket pinagkedkedan na laeng.
Kinunana nga awan iti ideya na nu sadino ti nagtaudan dagiti waragawag a palpak iti panagbalin na a sekretarya ti DepEd ken imbatad a daitoy ket panangdadael laeng kenkuana.
Maipalagip a kinuna ni Palace Press Officer Undersecretary Claire Castro a maysa a biddut ti panagbalin a DepEd Secretary ni Duterte agsipud ta naud-udin ti Pilipinas maipapan ti tay-ak ti edukasyon nu idasig kadagiti sabali a pagilian.
