BR LA UNION – Binilin ti Office of the Ombudsman ni Vice President Sara Duterte ken ti siyam nga opisyal ti DepEd ken iti Office of the Vice President (OVP) nga ag-sumite ti sungbatda iti reklamo mainaig iti mapapati a biddut a pannakausar iti confidential funds.
Adda 10 nga aldaw dagiti respondents manipud pannakaawatda tapno agsumite iti counter-affidavit ken witness statements ken dadduma pay a mangsuporta a dokumento.
Imballaag ti Ombudsman a ti saan a panagisubmitir iti uneg ti naituding a panawen ket maibilang a panangiwaksi iti kalintegan a mangipaay iti ebidensiya, ken tuloy iti preliminary investigation. Saan met a maawat ti anyaman a motion to dismiss wenno motion for bill of particulars.
Dagiti reklamo nga inpila ti Kamara kontra kenni Duterte ken dadduma pay ket pakairamanan ti plunder, technical malversation, falsification, bribery, perjury, ken panaglabsing iti konstitusyon.
Ti kaso nga indatag ti Kamara ket adda pakainaigan iti maipagarop a saan nga umiso a pannakausar ti ₱500M a confidential funds ti OVP ken ₱112.5M ti DepEd manipud 2022–2024.
Karaman pay dagiti maim-imbestigaran manipud DepEd ket isuda: Edward Fajardo, Gina Acosta, Atty. Sunshine Charry Fajardo, Maj. Gen. Nolasco Mempin (ret.),ken Undersecretary Annalyn Sevilla.
Manipud iti OVP, kabilang da Atty. Zuleika Lopez, Lemuel Ortonio, Lt. Col. Dennis Nolasco, ken Col. Raymund Dante Lachica.
