BR LA UNION – Kumpiyansa ni Vice President Sara Duterte a maipangabak na iti impeachment trial idiay Senado a nakatuding a mangrugi inton Hulyo ti agdama a tawen.
Iti maysa nga interview, imbaga ti bise presidente a nakitaripnong kadagiti abogado na idi simmangpet ditoy pagilian manipud The Hague, Netherlands.
Maipalagip a nagtalinaed ti bise iti nasao a pagilian ti dandani maysa a bulan tapno tumulong iti panangbukel ti defense team ti ama na a ni sigud a President Rodrigo Roa Duterte.
Segun kenni VP Sara , kumpiyansa met ti legal team na a dackel ti tsansa a maipangabak da iti kaso.
Iti likudan daytoy, nagkedked iti bise nga ibinglay iti ar-aramiden da a preparasyon iti nakatuding nga impeachment trial inton Hulyo.
Immunan a na-impeach ni VP Sara Duterte idiay Kamara.
Kabayatanna, kabilang kadagiti nagbalin a basaran ti impeachment ket ti maipagarop a biddut a panangusar ti pondo ti gobyerno ken dadduma pay a panaglabsing.
