LA UNION – Naglabsing iti allagaden ken tradisyon ni Vice President Sara Duterte ken nagkedked nga agsapata tapno agibaga ti kinapudno iti panagdar-ay na iti hearing ti House Committee on Good Government and Public Accountability idi kalman, nga adda pakainaiganna iti biddut a panangusar iti minilyon a pondo ti opisina na para iti socio-economic programs daytoy.
Kiniddaw ngamin ti Committee Chairman a ni Manila 3rd Rep. Joel Chua nga agsapata amin a naimbitaran a resource persons manipud iti office of the Vice President, Department of Budget and Management ken Commission on Audit.
Impaganetget ni Chua a tradisyon ken practice kadagiti maisay-sayangkat a panagdengngeg a pagsapataen dagiti testigo agraman dagiti resource persons.
Iti biang ni VP Sara, linabsing na iti rules ti komite agsipudta maysa isuna a resource person a rumbeng nga agsapata.
Suportado met ni sigud a Presidente ken Pampanga Representative Gloria Macapagal Arroyo iti takder ni VP Sara a saan nga agsapata.
Inyarig ni Arroyo iti Supreme Court ruling ken Senate precedent, nga iti maysa a testigo ket ipaayan ti proteksiyon kumpara iti resource person.
Idinto nga inlawlawag ni Bukidnon Rep. Keith Flores nga awan pay met ti inimbitaran da nga indibidwal iti panagdengngeg a maibilang nga akusado.
