LA UNION – Nakikaysa ni Atty. Gerry Cirilo iti pannaki-simpatiya ti Integrated Bar of the Phils. (IBP) ken ti komunidad, iti maseknan a pamilya ti napapatay a ni RTC Judge Mario Anacleto Bañez.
Iti eksklusibo a pannakiuman ti Bombo Radyo iti sigud a Labor Region-1 Director a ni Atty. Cirilo, inawagan na a kinatakrot a wagas ti pannakapatay ni Bañez kalpasan a naambush idi Martes, Nobyembre 5.
Kinuna na a saan a mailibak a panunuten ti kaadwan a posible nga adda pakainaigan iti trabaho ni Bañez kas huwes idiay Tagudin, Ilocos Sur iti pannakapapatay daytoy, ngem tarigagay na a maamwan ti pudno a makagapo, babaen iti mairuar-to a resulta iti imbestigasyon dagiti otoridad.
Mabalin met kunana nga adda pay sabali a motibo iti pannakapapatay ti huwes, a kas iti personal a susik wenno asasinasyon.
Impaganetget na a kapanunutan na laeng daytoy, ngem saan a rumbeng nga agbuteng ti prosekusyon iti panangipatungpal ti trabaho ken pagrebbengan dagitoy.
Iti napateg kunana ket maikkan ti pannakasolbar iti krimen babaen ti panagtitinnulong iti kunana a The Five Pillars of the Criminal Justice System, dagiti otoridad, komunidad, prosekusyon, korte, ken correction.
As a Colleague
Inawagan met a ‘barbaric act’ ni Atty. Edwin Siapco, dean iti SLC College of Law, ken kondinaren da unay iti wagas a pannakapapatay iti sigud a katrabahuan da a ni Judge Mario Anacleto Bañez.
Iti intero a Saint Louis College of Law, babaen kenni Atty. Siapco ket nangipeksa ti pannakipagladingit iti napagteng ni Judge Bañez.
Kinuna na a saan a napintas a damag daytoy para iti Louisian Community.
Ni Judge Bañez ket nagisuro iti SLC College of Law iti las-ud ti 20 a tawen ken kapanpanaw na laeng idi last semester
As a Fellow
Imbinsa-binsa met iti maysa a kasingedan a gayyem ni Judge Bañez, a ni Atty. Hanzel Guerrero ken regional state prosecutor iti Region 1, dagiti napipintas a galad ti gayyem na.
Kinuna na a nasingpet, naragsak ken pudno a gayyem ni Judge Bañez, responsable nga ama ken asawa, God- fearing ken drinking buddy dagitoy.
Imbinglay pay ni Atty. Guerrero iti plano da koma kenni Judge Bañez a mangipatakder ti folkhouse agsipudta agpada da a mahilig iti musika.
