LA UNION – Naaprubaran iti kanayunan a suweldo dagiti mangmangged iti Rehiyon 1.
Segun iti Regional Tripartite Wages and Productivity Board (RTWPB), adda ti kanayunan a P33 para iti inaldaw a suweldo dagiti mangmangged, nga agbalin nga epektibo inton Nobyembre 7.
Maibasar iti Wage Order 1-23, agbalinen a P435 iti minimum a suweldo dagiti adda iti agriculture ken non-agriculture sector, partikular dagiti addaan ti empleyado a saan a lumbes ti 10.
Agbalin metten a P468 ti suweldo dagiti adda iti non-agriculture sector, nga addaan ti empleyado a nasurok 10.
Kinuna ti Department of Labor and Employment (DOLE), iti nasao a kanayunan a suweldo ket 8 percent a panagngato manipud iti napalabas a minimum wage rates iti rehiyon.
Mabenipisyaran iti nasao a wage hike dagiti 170,143 a minimum wage earners ken 349,112 a full-time wage ken salary workers.
