LA UNION – Kas iti dadduma nga addaan iti nasitnaw a tarigagay iti panagidonar ti dara, maysa ditoy ni Joe Camarao a nakarikna iti ragsak kalpasan a napabilang kadagiti successful blood donors iti naisayangkat a Dugong Bombo 2019 ditoy La Union idi aldaw ti Sabado, Nobyembre 16.
Iti interview ti Bombo Radyo kenni Camarao, naistorya na a sipud idi adda kimmiddaw kenkuana ti tulong nga agbalin a blood donor para iti maysa a tao nga agkasapolan ket pinatgan na, nadiskubre na a nalag-an ti rikna a makatulong tapno maisalbar iti biag ti maysa a tao a makigub-gubal kenni patay.
Nupay maikatlon daytoy a daras a nagdonar ti dara, daytoy met ti umuna a pana boluntaryo na a nag-donate ti dara ditoy La Union.
Ni Camarao nga adda iti umno nga edad, maysa a ‘walis tambo weaver,’ ket taga Barangay Dagup, Bagulin, La Union isunga adayu iti travel na sakbay a nakadanon iti venue ti Dugong Bombo ditoy La Union.
Manipud iti balay da idiay kabatayan, kinuna ni Camarao a pinagna na iti 5 a kilometro agingga iti paradaan ti jeep agturong ditoy syudad ti San Fernando a maysa met nga oras iti biyahe.
Nakasangpet iti venue pasado alas 10:00 ti agsapa ngem alas 4:00 ti malem a nakapag-donar ti dara gapu iti kaatiddag ti pila dagiti blood donors.
Iti umuna a gundaway iti Bombo Radyo La Union, inabot ti blood letting project iti pasado alas 6:00 ti rabii gapu iti kaadu dagiti blood donors.
Nakaor-or ti Bombo Radyo La Union iti aganay 103,500 cc a dara manipud iti 230 successful blood donors iti naisayangkat a DB 2019 idiay DMMMSU Mid La Union Campus.
Iti Bombo Radyo La Union ket naartapan na iti bukod daytoy a record idi napan a tawen.
Manipud iti sigud a 135 successful blood donors idi napan a tawen, arigna nadoble ti nasao a bilang ita a tawen kalpasan a dimmanon iti 230 dagiti balligi a nakaidonar ti dara.
Manipud iti nasao a bilang dagiti blood donors, nakaor-or ti Bombo Radyo La Union iti 103,500 cc a dara kabinnulig iti Philippine Red Cross (PRC) La Union Chapter.
Malaksid kadagiti walk-in ken avid listeners/viewers ti Bombo Radyo a naayat a timmulong ken simmuporta iti nasao a proyekto, karaman pay a nakipartisipar iti panagdonar ti dara dagiti opisyal ken miyembro ti PNP, Phil. Army, Phil. Navy, BFP, BJMP, ken dadduma pay a law enforcers, dagiti opisyal ken ROTC cadets iti DMMMSU Mid La Union Campus.
