Saan pay a nangipaulog ti Sandiganbayan Fifth Division iti arrest warrant kontra kenni Senador Jinggoy Estrada mainaig iti kaso a plunder maipapan kadagiti maipagarup a nabaybay-an a flood control projects.
Segun kenni Sandiganbayan Presiding Justice Geraldine Econg, adda pay laeng ti pending motion nga impila ti kampo ni Estrada isu a saan pay a nangipaulog ti korte iti warrant.
Binigbig pay ti mahistrado ti urgent motion to withdraw ti issuance of warrant of arrest nga inpila dagiti abogado ni Estrada idi Biernes iti Sandiganbayan Second and Fifth Divisions.
Kinuna pay ni Econg a no apektaran ti nasao a mosion ti aksion ti korte ket mabalin a saan a mangipaulog ti Fifth Division iti warrant agingga a masolbar daytoy.
Maibilang a non-bailable offense ti plunder charge, kayatna a sawen, apaman a naipaulog ti arrest warrant, mabalin a maibalud a dagus ti akusado malaksid no maited ti petition for bail bayat ti pannakadengngeg ti kaso.
Kabayatanna, immun-una a nangipaulog ti Sandiganbayan Second Division iti arrest warrant kontra kada Estrada ken sigud a Public Works Secretary Manuel Bonoan mainaig iti kaso a flood control graft.
Dagus a nangiposte da Estrada ken Bonoan iti piyansa a P90,000 ti tunggal maysa tapno temporario a mawayawayaan.
Inlawlawag pay ti Presiding Justice a nabalinan ti dibisionda nga impaulog ti warrant ken Hold Departure Order gapu ta nangrugin ti deliberasion iti nasao a kaso sakbay nga indatag ni Estrada ti urgent motion.
Innayonna a dagus a nagsaritaanda no adda probable cause iti kaso kalpasan ti panagdeliberasionda.
