Awisen ti Gobierno Siudad ti San Fernando dagiti agtutubo ti Fernandino a makipaset iti masungad a Wellness Weekends a malukatan inton Hunio 27, 2026, kas paset ti agtultuloy a pannakaitandudo ti aktibo nga estilo ti panagbiag, disiplina, ken pakabuklan a salun-at dagiti agtutubo.
Itampok ti programa ti nadumaduma nga aktibidad ti isports para kadagiti ubbing nga agtawen iti 8 agingga iti 14. Karaman kadagiti isports a mabalin a pakipasetan ket ti Wushu, Pencak Silat, Table Tennis, Chess, Badminton, Volleyball, ken Boxing.
Segun iti lokal a gobierno, ti panggep ti Wellness Weekends ket tapno maparegta dagiti agtutubo nga agbalin nga aktibo iti pisikal nga aktibidad, mapadur-as ti talentoda iti benneg ti sports, ken maikkan dagitoy iti gundaway a makilangen ken makasursuro kadagiti dadduma nga agtutubo iti natalged ken positibo nga aglawlaw.
Mabalin a makipaset dagiti agtutubo nga umili iti Siudad ti San Fernando, La Union, kasta met dagiti estudyante nga agdama nga agad-adal ditoy siudad. Inlawlawag dagiti organizer a 50 laeng a makipaset iti tunggal isport ti maawat, isu a maparegta dagiti interesado nga agparehistro iti kabiitan a panawen.
Kabayatanna, maisayangkat ti panagrehistro iti Youth, Education, and Sports Development Office (YESDO) a masarakan iti maikadua a kadsaaran ti Marcos Building.
Babaen iti daytoy a programa, manamnama nga ad-adda a mapapigsa ti pannakipaset dagiti agtutubo iti sports ken wellness activities, bayat a maitandudo ti nasalun-at, produktibo, ken aktibo a komunidad iti Siudad ti Umili ti San Fernando. (Bombo Ericka Quinzon)
