LA UNION – Kinumpirma ti World Health Organization (WHO) iti kaunaan a laboratory-confirmed human case ti influenza A(H5N2) virus wenno bird flu.
Iti biktima ket maysa a 59 anyos a lalaki, residente idiay Mexico, a natay idi Abril 24, 2024.
Sakbay na ket nagsagaba ti biktima iti panaggurigor , narigat a panaganges, diarrhea ken nausea.
Maibasar iti record ti lalake, agsag-sagaba daytoy ti chronic kidney disease, type 2 diabetes, ken systemic arterial hypertension.
Immuna a na-admit iti maysa nga ospital idiay Mexico City idi April 23 ken dagus a pimmusay iti kabigatanna.
Segun iti World Health Organization, iti biktima ti kaunaan a laboratory-confirmed human case ti influenza A(H5N2) virus wenno bird flu virus.
Idi May 23, impadamag iti Mexican authorities iti nasao a kaso idiay United Nations kalpasan ti naunday a laboratory test.
Immuna a na-detect iti presensya ti bird flu virus idiay Mexico kadagiti naglabas a tawen ngem saan pay nga ammo ita, nu anya a lugar iti nagserbi a ‘source of exposure’, a nakaigapwan ti pannaka-akar iti biktima.
Iti likudan daytoy, inlaw-lawag ti World Health Organization nga awan ti pangta ti nalawa a panagwaras ti nasao a virus iti intero a populasyon idiay Mexico.
Rimuar ngamin a negatibo iti resulta ti testing a naisayangkat kadagiti amin nagbalin a contact ti biktima, nga immuna tri-nace dagiti otoridad.
Iti agdama, agtultuloy nga imon-monitor dagiti otoridad iti poultry farm nga adda iti aglawlaw ti balay ti biktima ken nangipasdek da pay iti monitoring system sadiay.
