Maysa a dakkel nga inspirasion para iti South Africa iti napartak a panagrang-ay ti agtutubo a defender a ni Mbekezeli Mbokazi, segun kenni team captain Ronwen Williams, bayat nga agsagsagana iti Bafana para iti napateg a laban kontra Czechia iti 2026 FIFA World Cup.
Kalpasan a naabakda iti Mexico, 2-0, iti opening match, masapul a makabawi iti South Africa tapno agtalinaed a sibibiag ti namnama nga umabante iti knockout stage. Maysa kadagiti manamnama a mangparang-ay iti team ket ti 21-años a center-back a ni Mbokazi, nga iti las-ud laeng ti 18 a bulan nakadanon iti entablado ti World Cup manipud iti lokal a liga.
Dinayaw ni Williams iti agtutubo a defender gapu iti dedikasion ken ti saan a mauma a panagregget iti uneg ti ay-ayam.
Innayon pay ti beterano a goalkeeper, agtultuloy ti pannakidangadang ni Mbokazi agingga iti maudi a minuto ti ay-ayam ken agserbi a modelo ti determinasion para kadagiti kakaduana.
Manipud idi debutna iti Orlando Pirates idi Disiembre 2024, napartak a ngimmato iti karera ni Mbokazi. Nagbalin a kaubingan a kapitan iti pakasaritaan ti bunggoy, immakar iti Major League Soccer a kaduana ti Chicago Fire idi 2026, ken dagus a simrek iti pangrugian a lineup ti South Africa iti World Cup.
Segun met kenni head coach Hugo Broos, dagus na a nakita iti potensial ni Mbokazi manipud iti umuna a pannakabuyana.
Dinayaw met ti South African football journalist a ni Neo Poho iti agtutubo a player, a kinunana nga addaan iti naraniag a masakbayan ken maibilang a maysa a “generational talent.”
Ni Mbokazi ket ammo pay babaen ti birngas na a “TLB” wenno Tractor-Loader-Backhoe gapu ti pigsa ken natibker a depensana iti uneg ti field.
Iti umay a laban kontra Czechia idiay Atlanta Stadium, manamnama a tulbek manen ni Mbokazi iti tarigagay ti South Africa a magun-od iti umuna a panagballigida ken umasideg iti historiko a iseserrek iti knockout stage ti FIFA World Cup 2026.###
