Binilin ti Department of Labor and Employment (DOLE) dagiti ubbing nga awan pay ti 15 a tawen na a mangala pay nga umuna ti Working Child Permit sakbay a makipaset kadagiti vlogs, livestreams, social media content, digital advertisements, web series, podcasts, streaming services, ken dadduma pay nga online media. Sakop daytoy ti Labor Advisory No. 12, Series of 2026, nga addaan panggep a palawaen iti proteksion ti Republic Act No. 9231 kontra iti child labor ken pananggundaway kadagiti digital platforms.
Segun ti ahensia, dua a situasion laeng iti palubusan ti linteg tapno makatrabaho dagiti ubbing nga awan pay ti 15 a tawen na: no adda iti sidong ti direkta a panangtaripato ti nagannak wenno legal guardian ken pamilya laeng iti kadua na nga agtrabaho, wenno napateg iti partisipasion ti ubing iti maysa a proyekto. Iti daytoy a dua a kaso, kasapulan latta iti panagala ti Working Child Permit manipud ti DOLE.
Nainget met a maipatungpal iti naituding nga oras ti pangtrabaho dagiti ubbing. Saan da a mabalin nga agtrabaho iti nalablabes ngem uppat nga oras tunggal aldaw ken 20 nga oras tunggal lawas.
Maiparit met iti panagtrabaho manipud alas-otso ti rabii agingga alas-sais ti bigat tapno mataripato iti salun-at ken saan a maapektaran iti panagadal da.
Innayon ti DOLE, responsibilidad dagiti nagannak, legal guardians, ken dagiti digital employers wenno brands iti panangsigurado a nakaala ti Working Child Permit iti ubing sakbay a rugyan iti aniaman a content production, maitunos iti agdama a linteg ken regulasion iti child protection.###
