LA UNION – Personal a nagturong ken nagkiddaw ti tulong iti estasyon ti Bombo Radyo La Union ti maysa a kolehiyala dahil sa ipinapatupad umano na ‘no return, no exchange policy ng RTW Paradise na nakabase sa San Jose Del Monte, Bulacan.
Iti exclusive interview ti third year college student a ni Sonia Cabigon, 18-anyos, residente iti syudad ti San Fernando, La Union, kinunana a kayatna a maisubli ti inorder-na a bado ken masubbot ti kwarta nga imbayadna iti RTW Paradise.
Sigun kenni Cabigon, nagtalek isuna nga ited ti supplier dagiti ini-order na a bado tapno maited kadagiti kliyentena ngem ngem saan a nasurot iti nagtulaganda a produkto.
Gapu iti daytoy, saan a kayat nga awaten dagiti kliyentena dagiti simmangpet a produkto ken saanna metten daytoy a mailako isu a kayatna a maisubli dagitoy.
Tarigagayna a maala ti kwarta nga imbayadna iti supplier tapno mai-refund dagiti imbayad kenkuana dagiti kliyente.
Innayon pay ni Cabigon, nga iti laksid ti pannakisaritana a nasayaat iti RTW Paradise tapno masubbot ti kwarta ken maisubli dagiti produkto ket saan nga immanamong ti supplier.
Napasamak ti transaksyon iti baetanda iti RTW Paradise babaen ti internet wenno social media, cellphone ken panangipatulod iti bayad babaen ti money remmitance center, kasaruno iti shipment dagiti produkto.
Kinuna pay ni Cabigon, a base kadagiti mabasbasana a comments iti group page dagitoy ti social media ket adu met iti padana nga agrekreklamo iti nasao a supplier.
Iti nasao a group page ket addaan ti rinibo a members.
Sinerrek ti kolehiyala ti on-line business tapno makatulong koma iti panangsupusop kadagiti kasapulanna iti panagadal.
Kabayatanna, iti met pannakiuman kenni Consumer Protection Division Chief Joyce Cabreros ti Department of Trade and Industry (DTI) – La Union, binalakadanna ni Cabigon nga agturong idiay opisinada tapno mangidatag ti reklamo.
Kalpasan a makaidatag ti complaint kinunana ket makakikoordinar dagitoy iti DTI idiay Bulacan wenno isuda a mismo iti mangpaayab ti supplier tapno agpalawag.
No mapaneknekan sigun kenni Cabreros a mangipatpatungpal iti ‘no return no exchange policy’ ti RTW Paradise ket mabalin a mapatawan daytoy iti maiyanatop a penalty.
Nagpalagip met ti DTI kadagiti mangitantandudo iti on-line business nga agannad kangrunaan kadagiti saan nga am-ammo a katransaksyon tapno saan a mabiktima wenno masayang ti kwarta a nagrigatan.
Pinadas met nga awagan iti Bombo Radyo ti cellphone number ti RTW Paradise tapno agpalawag ngem ‘out of coverage’ daytoy. (Abs Flores)
