Impaganetget ni Parañaque Representative Brian Yamsuan a ti pannakaipasa ti Right-to-Information (RTI) Act ket saan laeng a makatulong kadagiti umili no di ket agserbi pay a proteksion ti gobierno kontra kadagiti palso nga akusasion.
Segun kenkuana, no umno ti pannakairekord ken ma-access ti publiko dagiti desision ken addang ti gobierno, maliklikan ti panagsuspetsa ken palso a pammabasol kadagiti opisyal.
Panggep pay ti singasing a mangpalaka ti fact-checking ken malabanan iti panagwaras dagiti peke a damag iti pagilian.
Iti sidong ti bill, maaddaan ti “legal presumption” a pabor iti panangipaay ti impormasion no sadino obligasion ti gobierno nga ilawlawag no apay a saan a mabalin nga iruar iti maysa a dokumento.
Innayon pay ni Yamsuan, maipasdek ti RTI Commission a mangmonitor iti pannakaipatungpal ti linteg, ken maitandudo met ti media ken information literacy iti edukasion tapno mapapigsa iti responsable a pannakausar ti impormasion.###
