Nangipila ti 20 a bilang ti cyberlibel iti aktres Yasmine Vargas iti 20-count cyberlibel complaint kontra kadagiti sumagmamano nga indibidual mainaig kadagiti maipagarup a defamatory posts iti social media kontra kenkuana ken iti pamiliana.
Segun kenni Yasmine, saanen nga agulimek gapu ta kayatna a depensaan dagiti annak ken ti pamiliada manipud iti bullying ken biddut a pammabasol online.
Pinadasda a risuten daytoy iti nasaayat a wagas idi Pebrero, ngem nagtultuloy dagiti posts maibusor kadakuada.
Kenunana pay a dagiti naipila a kaso ket nasuportaran ti ebidensia ken dimmalan iti umno a proseso. Nupay kasta, saanna a dinakamat no siasino dagiti respondents iti reklamo.
Mainaig daytoy, immunan a nangipila ti reklamo da Yasmine ken ti asawana a ni Alfred Vargas iti Manila Prosecutor’s Office kontra kadagiti nagannak ti maysa a menor de edad a maipagarup a nairaman iti insidente ti panangbully iti anakda.
Segun iti agassawa, adda panaglabsing iti Special Protection of Children Against Abuse, Exploitation and Discrimination Act ken iti obligasion dagiti nagannak iti sidong ti Family Code.
Kabayatanna, inlibak ti kampo ti aktor a ni Rob Sy iti alegasion a bully ti anakna, ken impaganetget a nakasaganada a sumango iti reklamo ken lawlawagan iti isyu babaen ti umno a proseso.
Nagpanawagan ni Yasmine iti publiko a liklikan iti panangdadael ken makasair a sasao online, ken impaganetget nga awan ti lugar iti panangirurumen iti komunidad.###
