Dead on arrival iti Bacnotan District Hospital ti motorcycle rider kalpasan a dimmungpar iti private tricycle iti kawatiwatan ti national highway ti Brgy. Sta Rita idiay ili ti Bacnotan, La Union idi rabii.
Nabigbig ti pimmusay nga biktima a ni Aries Langtiwan, 24 anyos, baro ken residente iti Brgy. Taboc idiay ili ti San Juan, bayat a ti driver ti tricycle ket ni Robert Gasmin, 52, addan asawa ken residente ti Brgy. Narra idiay ili ti Bacnotan.
Maibasar iti imbestigasyon ti Bacnotan Police, daldalyasaren ti motorsiklo ti agpaamianan direksyon idinto nga agturong ti abagatan ti tricycle idi kellaat laengen a napasamak iti panagdinnungpar.
Gapu ti insidente, nagsagaba iti nakaro a sugat iti bagi ni Langtiwan no sadino indeklara a dead on arrival ti attending physician bayat a minor injury ti sinagaba iti ulo ni Gasmin.
Iti pannakiuman ti Bombo Radyo La Union kenni PSSG Ronaldo Agas, imbestigador ti Bacnotan Police, nakellaat laengen ni Gasmin idi dimmungpar iti sango ti lugan ti motorsiklo a naglugana ni Langtiwan.
Ti agdama, adda iti kustodiya ti Bacnotan Police si Gasmin para iti naan-anay a disposisyon bayat nga maur-uray ti panagsasaritada iti pamilya ni Langtiwan.
