LA UNION – Pimmusay kabayatan nga maag-agasan idiay Ilocos Training Regional & Medical Center (ITRMC) idiay syudad ti San Fernando ti driver iti tricycle iti napasamak nga panagdinnungpar ti dua a behikulo iti kawatiwatann ti San Gabriel Provincial Road Barangay Sto. Rosario, idiay ili ti San Juan, La Union.
Nabigbig ti pimmusay a biktima a ni Elvie Estolas, 39, addan asawa, tricycle driver ken residente ti Barangay Balballosa ti nadakamat nga ili.
Sakbay ti insidente, agpada nga daldalyasaten ti dua a behikulo ti nasao nga kalsada nga agturong ti agduma a direksyon.
Maipagarop nga immagaw ti linya na ti Tamaraw FX nga minaneho ni Joel Laceste, 29, addan asawa, residente ti Barangay Calincamasan iti nadakamat met laeng nga ili nga nagresulta iti pannakadungpar na iti tricycle.
Gapu ti daytoy, napukawan ti kontrol iti manibela ni Laceste no sadino naiturong daytoy iti bangir a paset ti kalsada nga makagapu iti pannakaipurwak ti biktima.
Nagsagaba ti sugat iti nadumaduma nga paset ti bagi na ti biktima no sadino pimmusay met laeng bayat a maag-agasan.
Kabayatan na, naduktalan nga adda iti impluwensya ti arak ti respondent driver maibasar iti panangammiris kenkuana ti doktor.
