Impasigurado ni House Deputy Speaker Janette Garin nga agtultuloy ti trabaho ti Kongreso iti panangisagana iti national budget ken panangsungbat iti posible nga epekto ti Super El Niño laksid ti impeachment trial ni Bise Presidente Sara Duterte.
Segun kenni Garin, saan a binaybay-an dagiti agpanpanday-linteg ti rebbenganda gapu laeng iti impeachment trial.
Kinunana, panawenen tapno maisagana dagiti gakat, pakairamanan ti national budget ken addang kontra iti epekto ti nakaro nga El Niño.
Inlawlawag pay ni Garin a saan a kinayat ti Kongreso ti impeachment proceedings, ngem pagrebbenganda a tamingen dagiti naipila a reklamo maitunos iti Konstitusion. Impaganetgetna a saan koma nga agsardeng ti dadduma a trabaho ti gobierno bayat nga agtultuloy iti panagusig.
Kabayatanna, impakdaar ti PAGASA a mabalin nga agpaut ti napigsa nga El Niño agingga iti umuna a paset ti 2027, a posible a pakaigapuan ti kinakurang ti tudo, tikag ken kinakurang ti suplay ti danum iti sumagmamano a lugar.
Isagsagana metten ti gobierno dagiti addang tapno masalakniban dagiti suplay ti taraon ken danum ken matulongan dagiti mannalon.
