Saan a rumbeng nga agbalin a balat sibuyas ti kampo ni Bise Presidente Sara Duterte kadagiti saludsod ti prosekusion maipapan kadagiti tree-planting activities ken ti posible a relasion iti daytoy iti Cale88 Foods Corporation.

Daytoy ti sungbat ti House prosecution spokesperson ken Lanao del Sur Representative Zia Alonto Adiong iti palawag ti Office of the Vice President (OVP) a mapangtikaw ken awan ti basaran ti panangpadas a mangisilpo ti aktibidad iti nasao a kompania.

Segun kenni Adiong, paset ti pagrebbengan ti prosekusion ti agimbestigar kadagiti posible a mainaig nga impormasyon tapno maidatag ti kinapudno iti impeachment court.

Nangrugi ti nasao a banag idi impakita ni private prosecutor Atty. Erwin Matib dagiti ladawan ni Duterte nga agmulmula iti kayo ken sinaludsod kenni Department of Trade and Industry Undersecretary Ceferino Rodolfo no mainaig daytoy iti obligasion ti Cale88 a mangimula iti saan a kumurang 100 a kayo kas paset ti requirement ti Board of Investments.