Nangited ti namnama kadagit biktima ti war on drugs ti umadani a panagusig kenni sigud a Presidente Rodrigo Duterte iti International Criminal Court (ICC), kalpasan ti sumagmamano tawen a panaguray a madusa dagiti addaan iti lukudan ti panaglabsing iti sidong ti kampanya a war on drugs .

Iti eksklusibo nga interview ti Bombo Radyo Philippines, kinuna ni Truth Commission spokesperson Carlos Conde a napateg ti pannakairugi ti trial saan laeng a para kadagiti biktima a direkta a karaman iti kaso nga ususigen ti ICC, no diket pati kadagiti dadduma pay a pamilya a mangnamnama a maikkan ti gundaway a magun-od ti hustisya.

Segun kenni Conde, nupay saan pay a masigurado no kasano kabayag ti panagusig ken no ania ti agbalin a pangeddeng dagiti judges, napateg latta nga idatag dagiti biktima dagiti padasda iti sango ti internasional a komunidad.

Impaganetget ni Conde a saan laeng a dagiti biktima a direkta a nairaman kadagiti kaso a dengdenggen ti ICC ti makarikna iti namnama, no di pay ket dagiti dadduma a pamilia a naapektaran iti kampania kontra iti droga a saan a karaman iti agdama a kaso.

Naituding a mangrugi ti trial ni Duterte iti ICC inton Nobiembre 30, 2026 gapu iti kaso a crimes against humanity, pakairamanan ti murder ken attempted murder, mainaig kadagiti mapapati a pammapatay bayat ti panagtakemna kas mayor ti Siudad ti Davao ken kas presidente ti pagilian.