Nangipaulog dagiti prosecutor ti International Criminal Court (ICC) ti kanayunan a testimonya tapnu kuwestiyunen iti waragawag ti Philippine National Police (PNP) a self-defense iti rason dagiti pammapatay iti drug war ni sigud a Presidente Rodrigo Duterte.
Iti maika-10 nga aplikasyon daitoy iti sidong ti Rule 68(3), kiniddaw ti ICC prosecution nga awaten iti immuna a testimonya ti dua a testigo nga isuda P-0025 ken P-1382, a maipagarop a naglaon dagiti ebidensya iti nalawa a pammapatay ken iti nagdumaan dagiti police accounts.
Karaman kadagiti kaso a naibata iti pammapatay kenni sigud nga Ozamiz City Mayor Reynaldo Parojinog Sr. ken sumagmamano nga indibidwal idi Hulyo 2017, kasta metten iti pannakatay ti teenager a ni Kian delos Santos idi Agosto 2017.
Segun iti prosecution, adda dagiti testimonya a kumonkontra iti self-defense claims ti pulisya ken sumupsuporta iti alegasyon iti nalawa a pammapatay iti sidong ti drug war.
