Segun kenni House Prosecution Spokesperson Representative Zia Alonto Adiong, adayo ti testimonia dagiti dua a testigo ti depensa ni Bise Presidente Sara Duterte iti sentro ti isyu ti Article II ti impeachment complaint.

Punto ni Adiong, ti kangrunaan a nasken a malawlawagan ket ti mapapati a saan nga umiso a pannakaideklara dagiti sanikua ti bise presidente ken dagiti mapagduaduaan a transaksion nga umabot iti P1.5 billion nga impadamag ti Anti-Money Laundering Council wenno AMLC.

Malagip nga iti maika-45 nga aldaw ti impeachment trial idi kalman a Biernes, Nobiembre 20, nagtestigo ni Department of Trade and Industry Undersecretary Ceferino Rodolfo maipapan iti pannakairehistro ti Cale88 Foods Corporation kas export enterprise iti sidong ti Board of Investments, agraman dagiti permit ken sertipikasion.

Kabayatanna, sinaruno met daytoy ni Food and Drug Administration Director IV Pilar Marilyn Pagayunan a nangidatag kadagiti dokumento mainaig iti pannakairehistro ti banana chips a pinataud ti nasao a kompania.

Segun kenni Adiong, awan ti nakita nga umdas a panangilawlawag dagiti testigo mainaig iti panagserrek ti remittances kadagiti corporate bank accounts dagiti kompania a nairaman iti nasao nga isyu.

Partikular a kinuna ni Adiong a ti testimonia ni Rodolfo ket naipamaysa laeng iti panagala ti Cale88 iti permit ken sertipikasion tapno ag-operate kas export enterprise.

Kabayatanna, ti presentasion ni Pagayunan ket maipapan iti panagrehistro ti banana chips ti kompania.

Para kenni Adiong, saan a nasungbatan dagiti kangrunaan a saludsod iti Artikulo II, partikular dagiti alegasion maipapan kadagiti sanikua ti bise presidente, ti mapapati a saan nga umiso a deklarasion, ken mapagduaduaan a transaksion nga ipunpunto ti prosekusion.

Kabayatanna, manamnama nga agsubli ken agtuloy ti impeachment trial inton Disyembre 1 kalpasan a saan a matuloy dagiti umuna a nakaituding nga hearing inton Nobiembre 26 ken 27 gapu iti mapapati a kinaawan dagiti sumaruno a defense witnesses.