Nangipaulog ti Senate Impeachment Court ti show-cause order kontra kenni Atty. Paolo Panelo Jr., spokesperson ni Bise President Sara Duterte, kasaruno dagiti sasaona nga adda bias dagiti dadduma a senador nga agserserbi a kas judge iti impeachment trial.
Partikular a tinukoy ni Panelo da Senador Risa Hontiveros, Francis Pangilinan ken Raffy Tulfo kalpasan a kinuestion dagitoy ti kredibilidad ti testigo a ni Rainer Dela Fuente.
Kabayatanna nangipila ni Senador Erwin Tulfo ti mosion a mangibilin kenni Panelo a mangilawlawag kadagiti statement-na. Inaprobaran met daytoy ni Senate Impeachment Court Presiding Officer Francis Escudero.
Inlawlawag ni Escudero a nupay saan a direkta a sakupen ni Panelo ti sub judice rule, mabalin latta nga agaplikar dagiti probision ti Rules of Court mainaig iti contempt.
Kas sungbat, impaganetget ni Panelo nga adda karbengan ti publiko a mangbabalaw kadagiti opisyales ken ti aramid dagitoy, nagkari met daytoy a sungbatanna ti bilin iti korte
Ti show-cause order ket mangited kenni Panelo iti gundaway a mangilawlawag iti dasigna sakbay nga agkeddeng ti impeachment court nu adda umdas a basaran ti panangipila ti maiyannatup nga aksyon.











