Ibilang ni University of the Philippines (UP) College of Law Associate Dean Atty. Paolo Emmanuel Tamase kas ‘damaging’ iti kaso ni VP Sara Duterte ti sumagmamano a testimonia dagiti testigo nga indatag ti defence team.
Segun iti eksperto nga abogado, imbes a makatulong ti bise presidente, ad-adda pay a makadadael ti dadduma kadagiti nadakamat a testimonia.
Inyarigan na daytoy kadagiti statement dagiti napalabas a testigo a mainaig iti GenCorp Industries, maysa kadagiti kompania a nakailista iti ‘interes ti negosio’ ni VP Sara, a naibasar iti Statement of Assets, Liabilities, ken Net Worth-na.
Segun kenni Atty. Tamase, kayat idi nga ipunto ti depensa nga awan iti corporate books kas stockholder, director wennu opisyal ti bise presidente.
Nupay kasta, dagiti testigo ti depensa mismo ti nangdakamat a regular daytoy nga umaw-awat iti kuarta manipud iti kompania.
Maibasar iti iskediul nga inruar ti Senate Impeachment Court, inton Disiembre 1 ti pannakairugi manen ti impeachment trial kontra iti bise presidente a sadiay agtultuloy ti panangidatag ti defence team kadagiti testigo ken ebidensia.
Nupay adun kadagiti testigo ti saan na nagtuloy, naaramiden ti Depensa nga ipresentar iti siam a kadagitoy, pakairamanan ti innem a testigo manipud Nobiembre 9-12 ken tallo manipud Nobiembre 19-20.











