BR LA UNION – Nasurok a 113 nga indibidwal iti inaresto ti Manila Police District (MPD) kalpasan ti napasamak a riribok iti baetan dagiti pulis ken sumagmamano a grupo dagiti agtutubo idiay Mendiola, Ayala Bridge ken paset ti Recto.
Segun kenni MPD Public Information Office Chief and Spokesperson PMaj. Philipp Ines, iti nasao a bilang, dandani umabot ti kagudwa kadagiti natiliw ket menor de edad bayat nga 65 dagiti legal age.
Sumango iti naduma-duma a kaso dagiti naaresto, gaputi panagbarsak ti bat-bato, panagdadael ti sanikua, ken panaguram ti pilid bayat ti naisayangkat nga anti-corruption rally idi kalman, Setyembre 21, 2025.
Kinuna pay ni Ines a 93 a pulis ti nagsagaba ti injury wenno pannakadangran.
Iti nasao a bilang, walo (8) ti naaddaan ti sugat, siyam (9) ti naiturong idiay Philippine National Police General Hospital tapno maagasan, ken maysa (1) ti kasapolan a ma-admit gaputi nasal fracture.
Dagiti 75 PNP personnel a nagsagaba ti pannakadunor ket naipaayan ti first aid ngem saanen a na-ospital.
Kinuna met ni Interior Secretary Jonvic Remulla, kaadwan kadagiti naka-maskara wenno naka-abungot ti ulo a nangbarsak ti bato kadagiti pulis idiay Ayala ken Mendiola ket menor de edad.
Timpuar ti riribok idi rinugyan dagiti nasao nga agtutubo nga agpuor ti pilid iti sango ti shipping container, a nagserbi nga obstacle dagiti nakabantay nga otoridad.
Napuwersa dagiti pulis nga usaren ti riot shields tapno protektaran ti bagi da manipud kadagiti nagtayab a botelya, pintura, ken bato nga imbarsak ti nasao a grupo dagiti lallaki.
