Impasigurado manen ti administrasion ni Presidente Ferdinand Marcos Jr. ti nainget a kampaniana kontra iti illegal a droga kasaruno ti umuna a resulta ti imbestigasion iti 521-kilogram a kargamento ti mapapati a droga nga aggatad iti P3.5 billion, a nakumpiskar sadiay Laos nga agturong kuma ditoy Pilipinas.
Iti press briefing sadiay Malacañang idi Biyernes, inbinglay ni Interior and Local Government Secretary Jonvic Remulla ti kinasiasino dagiti sumagmamano a personalidad a maipagarup a karaman iti operasion. Segun kenni Remulla, agtintinnulong ti Philippine Drug Enforcement Agency (PDEA) ken ti Philippine National Police (PNP) babaen ti joint task force tapno malapdan ti iseserrek ti iligal a droga ditoy pagilian.
Inruar met ti Department of the Interior and Local Government ti link chart a mangipakpakita iti mapapati a relasion dagiti 11 persons of interest, manipud iti panaggatang iti pribado nga eroplano agingga iti gandat a pannakaipatulod ti droga ditoy pagilian.
Kinuna ni PNP Chief Police General Jose Melencio Nartatez Jr. nga addan iti kustodia ti pulisya ti maysa kadagiti person of interest, idinto nga agtultuloy a mamonmonitor dagiti dadduma. Nupay kasta, awan pay ti naipila a kaso wenno warrant of arrest kontra kadakuada isu a saanda pay a mabalin a maarestar.
