LA UNION – Maisagsaganan ti kaso a panaglabsing iti RA 9165 wenno Comprehensive Dangerous Drugs Act ken Robbery kontra iti maysa a 18-anyos a baro, a naaktuan nga agtaktakaw ken nakumpiskaran pay ti iligal a droga, idiay Barangay Urbiztondo, San Juan, La Union.
Nabigbig iti suspek a ni Jeric Echeveri, residente ti Barangay Masinloc, Zambales.
Maibasar iti report, nagresponde dagiti kameng ti San Juan PNP iti napasamak a panagtakawan iti pagtaengen ti managan Sonia Tabios, addaan asawa, 63, residente ti Barangay Urbiztondo ket balligi met a natiliw da iti suspek.
Nakumpiskar manipud iti suspek dagiti maipagarop a tinakaw na a nadumaduma nga alahas.
Kabayatan iti panangkapkapda kenkuana, nakaala pay dagiti otoridad iti nabalkot a maipagarop a bulong ti marijuana.
Iti agdama ket nakabalud ti suspek idiay San Juan Police Station.
