BR LA UNION – Dua a napigsa ken nagsaruno nga aftershock ti narikna iti kabaybayan idiay Sarangani, Davao Occidental ita a rabii ti Miyerkoles, segun iti Philippine Institute of Volcanology and Seismology (PHIVOLCS).
Segun iti PHIVOLCS, dagiti narikna a panagdayyeg ket aftershock iti magnitude 7.8 a ginggined idiay Sarangani ken ti magnitude 6.5 a ginggined idiay Davao Occidental a nairekord idi napan a bulan.
Immuna a nairekord ti magnitude 5.5 a ginggined agarop alas 9:16 ti rabii abagatan a laud ti Sarangani, Davao Occidental. Tectonic ti nagtaudanna ken 10 a kilometro ti kaunegna.
Kalpasan ti sumagmamano a minuto, agarop alas 9:23 ti rabii, maysa pay a magnitude 5.3 a gingined ti timmama iti abagatan a laud ti Balut Island, Sarangani; addaan met daytoy iti kauneg a 10 a kilometro ken tectonic in origin.
Segun iti PHIVOLCS, awan ti namnamaen a perdisyon manipud iti magnitude 5.3 a gingined, ngem posible nga adda pay sumagannad nga aftershock.
