BR LA UNION – Iti eksakto nga alas tres ti malem ita nga aldaw, Marso 8, 2025, nagdisso ti eroplano a C-130 idiay Villamor Airbase, a nakailuganan iti bangkay dagiti natay a piloto ti nagsuwek nga FA-50 fighter jet, isuda Major Jude Salang-Oy ken First Lt. Abril Juan Dadulla.
Idi naibaba ti bangkayda manipud iti eroplano, dagus a naikkan dagitoy iti arrival honors ken pammadayaw babaen ti Philippine Air Force (PAF).
Indaulwan daytoy ni DND Secretary Gilberto Teodoro Jr., Special Assistant to the President Secretary Antonio Lagdameo Jr., AFP Chief of Staff General Romeo Brawner Jr., ken sumagmamano pay a nangato nga opisyal ti PAF.
Segun kenni PAF spokesperson Col. Consuelo Castillo, ti pammadayaw nga inawat dagiti dua a natay a piloto ket ti Distinguish Aviation Cross. Daytoy ti kangatuan a pammadayaw a maited iti maysa a kameng ti PAF a nakaaramid iti naisangsangayan a serbisyo ken nangipakita iti tured, dedikasyon, ken kinalaing iti pagrebbenganda.
Segun pay kenni Col. Castillo, maisayangkat ti vigil idiay Villamor Airbase.
Saan pay a masigurado no kaatno kabayag ti panagtalinaed dagiti bangkay dagiti piloto idiay Pasay, ngem planoda nga iyakar dagitoy iti Basa Air Base idiay Pampanga tapno makaduada dagiti padada a fighter pilots agingga iti rabii ti Martes.
Inton Miyerkules, maiyawid iti bangkay dagiti piloto iti bukodda nga ili.
Kabayatanna, karaman dagiti simmabat dagiti kameng ti pamilya ken nasinged a gagayyem dagiti pimmusay a piloto .
Nagkedked ti pamilya nga agpa-interview, ket segun kenni Col. Castillo, immapela ti pamilya a respetuen ti privacy da kabayatan ti vigil a maangay iti Villamor Airbase.
