LA UNION – Nakabaluden ita idiay kwerpo ti pulisya dagiti dua a maipagarup a carnapper a nangitaray iti dua nga sports utility vehicle idiay probinsya ti La Union.
Nabigbig dagiti suspek nga isuda Ren Tinana III, 30, residente ti Sampaloc, Manila; ken Mairicel Hipolito, 56, nga agnanaed idiay Taal, Batangas.
Naammuan ti Bombo Radyo manipud iti La Union Police Provincial Office (LUPPO), maipagarup a nagturong idiay opisinada ti biktima ken makin-SUV a ni Jackie Palabay, 38, residente ti Barangay Carlatan ti syudad iti San Fernando tapno ipakaammo nga umad-adayo manipud iti syudad ti impaabangna a lugan base iti monitoring daytoy ti GPS ken atapenna a panggep dagiti suspek ti lugan.
Ngem idi a kamaten ti naduma-duma a unit ti pulisya ti SUV ket dimmungpar daytoy iti maysa a puon ti kayo kasaruno iti pannakatiliw dagiti suspek.
Iti pannakiuman met kenni Tinana, kinunana a naammuanna manipud ti social media a papaabangan ni Palabay ti nasao a lugan isu a naaddaan daytoy ti interes a rentaan.
Saanna met nga inlibak a kayatna nga itaray ti SUV ken iturong na daytoy iti maysa a casino idiay Manila tapno isalda.
Inaklon met ni Tinana a naigamer daytoy iti sugal ken adda metten ti sumagmamano a nabiktimana iti kapada a modus.
