LA UNION – Sumangsango iti kaso a panaglabsing ti Section 2 ken 11 iti RA 9165 ti dua nga Indian national iti insayangkat a buy bust operation ti Tubao Police Station ken Philippine Drug Enforcement Agency (PDEA) Region 1 idiay Barangay Francia West, Tubao, La Union.
Nabigbig dagitoy a da Kulvir Nakhwal, 21, baro ken ni Harpreet Signh, 30, addan asawa, driver ti motorsiklo, agpada nga residente ti Barangay San Julian Norte, iti ili ti Agoo ditoy probinsya.
Nakumpiskar kadagiti suspek ti (1) sachet ti maatap a shabu ken P1,000 kas buy bust money, cash nga umabot iti P8,200 ken (1) motorsiklo.
Iti pannakiuman ti Bombo Radyo La Union kenni PSI Vergelio Cruz, officer in charge ti Tubao PNP, sumagmamano nga lawas a sinipsipotanda ti dua nga suspek, a malaksid iti negosyo dagitoy a 5-6 ket maipagarop nga aglaklako pay dagitoy ti droga.
Base iti rekord ti kapulisan, dagii suspek ket maibilang a newly identified drug personality idiay ili ti Tubao.
