LA UNION – Inarestar dagiti otoridad iti dua nga indibiduwal nga akto a natiliwan a nagtakaw iti baterya ti truck, manipud iti maysa a dressing plant idiay Rabon, Rosario, La Union.
Nabigbig dagitoy nga isuda Eduard Tulawan, 19, baro ken Jayson de Guzman, 37, addaan asawa, agpada a residente ti Sta Barbara, Pangasinan.
Maibasar iti report, nakitinnulong iti guwardiya ti planta, managan Jonathan Aquilino, 47, ti Dagupan City Pangasinan para iti pannakatiliw dagiti suspek, kalpasan a ginandat dagitoy ti aglibas.
Iti pannakatiliw dagiti suspek, nakarekobre dagiti otoridad iti uppat a baterya ti lugan, malaksid laeng iti dua a baterya a ginandat dagitoy a takawen manipud iti nakaparada a truck idiay Rosario, La Union.
Nupay kasta, naamwan a nakalibas ti maysa a kadwa dagitoy, nabigbig iti nagan a Gerald de Leon alyas ALDON.
Iti agdama, dagiti suspek ket agtaltalinaed iti custodiya ti Rosario PNP agraman iti motorsiklo a nagserbi a getaway vehicle dagiti suspek.
