LA UNION – Naibalud iti jail facility ti Philippine Drug Enforcement Agency Regional Office I-Regional Special Enforcement Service idiay Camp Diego Silang, Carlatan, San Fernando City, La Union iti dua a lallaki a taga-Benguet gaputi panangisalog da ti dua a kilo ti maipagarop a napagango bulong ti marijuana ditoy siyudad ti San Fernando.
Babaen iti buy-bust operation nga impatungpal ti nagtipon a puwersa ti Philippine Drug Enforcement Agency Regional Office I-Regional Special Enforcement Service (PDEA RO I-RSET), PDEA Intelligence and Investigation Section (PDEA-IIS) ken La Union Police Provincial Office-Provincial Drug Enforcement Unit (LUPPO-PDEU) idiay Sitio Bataan, Barangay Pagudpud, San Fernando City, La Union agarop alas 11:50 ti rabii idi Martes, Disyembre 3, naarestar dagiti dua a maibilang a high-value target drug personalities.
Binigbig ni PDEA RO 1 Regional Director, Director III Joel B. Plaza dagiti suspek nga isuda: Mike Kevin Ancheta Bane, 29 years old, car rental driver; ken Jash Quezada Balonzo, 27, agpada a residente ti Baguio City, Benguet.
Dagiti nakumpiskar a dried marijuana leaves a nabalkot ti nangisit a plastic bag ken asul a sako ket agbalor ti P60,000.00
Karaman pay a kinumpiskar dagiti otoridad kadagiti suspek iti maysa a mobile phone, kotse (Toyota Altis), ken buy-bust money.
Sumangsango dagiti suspek iti kaso a panaglabsing iti Section 5, Article II iti RA 9165, wenno Comprehensive Dangerous Drugs Act of 2002.
