BR LA UNION – Im-imbestigaran ti Philippine Embassy idiay United Arab Emirates iti report a dua a Pilipino ti maipagarop a naarestar idiay Dubai gapu iti maipagarop a panangi-record ken panangi-share ti video seknan iti napasamak a panagraut sadiay idi kallabes.
Iti statement ti Philippine Embassy idiay Abu Dhabi ken Consulate General idiay Dubai, kinunada a nagkiddawda iti opisyal a kumpirmasyon ken impormasyon manipud kadagiti otoridad idiay UAE maipapan ti kinasiasino, agdama a kasasaad ken legal a kasasaad dagiti dua a mairamraman a Pilipino.
Segun kadagiti opisyal, respetuen ti Pilipinas ti soberanya ti UAE ken ti panangipatungpalna ti linteg a mainaig iti national security, cybercrime, ken public order kalpasan ti panangipalagip dagiti otoridad idiay UAE, a ti panangibinglay kadagiti palso wenno saan a beripikado nga impormasyon maipapan iti seguridad, pakairamanan dagiti video ti air defense interceptions, panagraut kadagiti landmark, uray dagiti AI-generated a video ket mabalin a maibilang a krimen nga adda kaibatugan a pannusa a pannakaibalud ken nadagsen multa.
Gaputi dayta, nagpanawagan dagiti diplomatiko nga opisyal kadagiti Pilipino idiay UAE nga agannad kadagiti garaw iti online ken nabalakadan ti komunidad a liklikan iti agala ti video, ag-post online wenno panagkomento kadagiti saan a kumpirmado nga isyu iti seguridad, imbes ket agala laeng kadagiti opisyal nga statement manipud iti gobierno ti UAE.
Kabayatanna, maibasar iti report, dua a Pilipino ti karaman kadagiti 25 a tattao a mapapati a naaresto gapu iti panangibinglayda kadagiti video iti internet mainaig iti panangraut.
Karaman pay kadagiti naaresto ti sumagmamano a ganggannaet manipud India, Pakistan, ken Bangladesh.
