LA UNION – Naminsan manen a nagpalagip iti pulisya ti publiko maipapan ti nainget a panangipatungpal ti “Oplan Rody” (Rid the Streets of Drunkards and Youths) wenno panangtiliw kadagiti tambay idiay probinsya ti La Union.
Iti pannakiuman ti Bombo Radyo kenni C/Ins. Silverio Ordinado Jr., Spokesperson ti La Union Police Provincial Office (LUPPO), kinunana a sipud idi Dominggo agingga idi rabii ket umaboten iti 207 a tambay ti natiliw kadagiti naduma-duma nga ili.
Sigun kenni Oridnado, kaaddua kadagiti natiliw ket agtutubo a naglabsing ti ordinansa maipapan ti curfew hour ken sabali pay dagiti nataengan nga agbasak-basak iti dis-oras iti rabii a nabartek.
Kabayatanna, napaayaban met iti nagannak dagiti natiliw nga agtutubo kadagiti istasyon ti pulisya tapno mabagbagaan dagitoy.
Immunan nga inlawlawag ni S/Supt. Ricardo Layug Jr., Provincial Director iti LUPPO, a ti crackdown operation kontra kadagiti tambay ket maiyannurot iti direktiba ni Pangulo Rodrigo Duterte iti pulisya babaen ti panangidaulo ni PNP Chief Director General Oscar Albayalde.
Impanamnama met ni Layug a saan a malabsing iti karbengan pantao ti panangipatungpal ti nasao nga operasyon gapu ta maibasar amin a tignayda iti lokal nga ordinansa ken linteg nga agraraira iti masakupan dagitoy a lugar.
Impaganetget ti pulisya a babaen ti Oplan Rody ket maprebentaran a rumsua iti riribok wenno krimen a mabalin nga aramiden dagiti tambay ken para met laeng daytoy iti proteksyon dagiti umili. (Absalom S. Flores)
