BR LA UNION – Natay iti 21 hostages ken uppat a tropa ti militar idiay Pakistan kalpasan nga i-hijack ti militante a grupo ti Baloch Liberation Army (BAL) iti maysa a pampasahero a train idiay Quetta City.
Segun kadagiti otoridad, ti tren ket agturong koma idiay probinsiya ti Khyber Pakhtunkhwa Pakistan nga addaan ti karga a 440 a pasahero.
Kinumpirma ti militar a napatayda ti 33 a militante iti maysa nga encounter.
Sakbay ti insidente, immuna nga imbaga ti Baloch Liberation Army a 50 a pasahero ti pinatayda idi rabii ti Miyerkoles ken 214 a tattao ti iggemda a kaaduanna ket security personnel.
Impangtada pay a papatayenda dagiti hostage malaksid no matungpal dagiti kalikagumda, a mawaya-wayaan dagiti Baloch political prisoners, aktibista, ken mapukpukaw a tao a kabilang kadagiti dinukot.
Sungbat met ni Junior Interior Minister Talal Chaudhry a nakasuot dagiti militante kadagiti suicide vest bayat a nakatugawda iti nagbaetan dagiti pasahero iggem dagiti hostage, a nangparigat ti operasyon dagitoy.
