Nairekord ti 211 nga aktibo a kaso ti Immunodeficiency Virus-Acquired Immunodeficiency Syndrome (HIV-AIDS) idiay ciudad ti Baguio.
Maibasar ti datos manipud City Health Services Office-Reproductive Health and Wellness Center idi laeng napalabas a bulan ti Nobyembre, adda iti tawen 20 agingga 29 a tawen ti maak-akaran iti HIV-AIDS.
Pakadanagan daitoy ti lokal a gobierno agsipud ta umub-ubing dagiti maipadpadamag a maak-akaran iti nasao a virus.
Panggep met ti City Health Services Office ken dagiti partners da nga wakasan ti HIV-AIDS inton 2030 babaen ti panangipaay kadagiti programa a makatulong ti panagkissay ti sakit nga HIV-AIDS ditoy Pilipinas.
Karaman ditoy ti panangited kadagiti pakaammo iti safe sex.
Idi tawen 2023, insayangkat ti City Health Services Office ti kaunaana a school-based HIV testing nga addaan panggep nga ikkaten ti ‘stigma’ kadagiti amin a Pilipino mainaig ti HIV-AIDS nu kasta ket nalaklaka iti panakitinnulong tapno maagasan daitoy.
