BR LA UNION – Imbinglay ni Bicol Saro partylist Rep. Terry Ridon nga umabot iti 215 kongresista ti nakasagana a bumotos pabor iti impeachment kontra kenni Vice President Sara Duterte, maibasar iti konsultasyon da idiay Kamara.
Ti nasao a bilang ket kapada kadagiti nagpirma iti immuna nga impeachment complaint idi Pebrero 2025, nga idi agangay ket indeklara ti Korte Suprema nga unconstitutional gapu iti kinakurang ti due process.
Ita a gundaway, kumpiyansa ni Ridon a mai-transmit idiay Senado ti Articles of Impeachment, agsipudta limbesen ti bilang iti 106 a botos a minimum requirement tapno maipasa ti kaso.
Maibasar iti report ti House Committee on Justice, nakakita ti probable cause iti komite seknan dagiti alegasyon iti misuse ti confidential funds nga umabot iti P612.5 milyon, kabilang iti P448 milyon a maipas-pasubli iti Bise Presidente.
Natalantan pay iti maipagarop a P6.7 bilyon a transaksyon a konektado iti pamilya Duterte-Carpio, agraman dagiti testimonya seknan iti ‘kill threat’ kontra iti sumagmamano nga opisyal ti gobyerno.
Namnamaen nga inton Mayo 11, 2026 ket maisayangkat ti binnotosan iti plenaryo idiay Kamara.
Nu maaprubaran, dagus a maipatulod idiay Senado nga agserbi kas impeachment court.
Target dagiti mammanday linteg a mai-transmit ti kaso iti uneg ti dua a lawas tapno marugyanen ti panagusig.
