Nupay makomikom dagiti otoridad iti panagbantay kadagiti kalsada ken dadduma pay a pampubliko a lugar iti panangipatungpal dagiti allagaden iti General Community Quarantine gapwanan ti coronavirus pandemic, saan met a nakalasat iti maysa a masikog ken maysa a baro iti linabsing da a linteg nga adda pakainaigan na iti iligal a droga.
Iti insayangkat a buy bust operation, inarestar dagiti kameng ti La Union Provincial Drug Enforcement Unit (LUPDEU), PDEA-RO1, ken San Fernando City PS, dagiti suspek, isuda: Jay-R Quiban, 21, residente ti Brgy. Catbangen ken Jesil Llagas, 25, pito bulan a masikog, ken agnanaed ita iti Barangay San Francisco San Fernando City La Union.
Kinumpiskar dagiti otoridad manipud iti ikot dagiti suspek iti maipagarop a shabu nga addaan ti DDB value a P6800 ken maysa a (1) piraso ti P1,000 bill a nagserbi a buy-bust money.
Kaso a panaglabsing iti Art II Section 5 ti RA 9165 iti sangsangwen ita dagiti suspek.
Kabayatanna, nakasangit ni Llagas idi salodsoden ti Bombo Radyo nu manu bulan ti sikog na.
Kinuna na a pito bulan iti sikog na ket adda pay maysa nga anak na nga agtawen ti uppat.
Segun kenni Llagas, naaramid na ti aglako ti droga gaputi maipagarop a kaawan ti suporta a maaw-awat na manipud iti mister na a nagtrabaho idiay Tarlac ken naabutan ti lockdown.
Innayon na nga adda pay plano na nga agawid idiay Northern Samar.
