BR LA UNION – Nakailista iti Philippine National Police (PNP) ti pakabuklan a 28 a kaso ti vote buying iti intero a pagilian agingga idi aldaw ti panagbotos idi May 12.
Maibasar iti report ti PNP, kadagiti 28 nga insidente ti vote buying ket pakabuklan nga 68 indibidwal manipud naduma-duma a paset ti pagilian iti nadetermina a karaman.
Kadagiti nasao a kaso, 19 dagiti naaresto bayat a 22 ti sap-sapolen dagiti otoridad.
Iti nasao a bilang, lima a kaso ti saan pay a naisumite, maysa ti nag-piyansa, walo ti for filing, walo met ti na-dismiss, ken innem ti agtultuloy a maim-imbestigaran.
Segun kenni PNP Chief, Police General Rommel Francisco D. Marbil, iti panangi-pamaysa ti pulisya kadagiti kaso ti vote buying ket panagtulnog iti direktiba ni President Ferdinand R. Marcos Jr. a parmeken ti vote buying ken siguradwen ti integridad iti 2025 National and Local Elections.
Adu a kaso ti vote buying a nailista ti PNP ket nagtaud iti regional office daytoy.
Siniguro met ni Gen. Marbil nga itul-tuloy ti pulisya nga usigen dagiti karaman iti vote buying tapno pagsungbaten dagitoy, laksid a nalpasen iti panagpili dagiti agtugaw nga opisyal.
